Lansman versyon Kreol Polisi Nasyonal pour Lazenes ti ganny fer Sanmdi le 23 Oktob dan lasal konferans kot Konsey Nasyonal pour Lazenes.

Apre lansman katriyenm edisyon Polisi Nasyonal pour Lazenes an versyon angle le  11 Avril 2019, Departman Lazenes ek Sport ti vwar nesesite pour osi annan en versyon an Kreol pour kat rezon prensipal-

1. Kreol i nou lalang maternel;
2. Kreol i enn parmi nou trwa lalang ofisyel;
3. Akse avek lenformasyon dan en fason kler e konpreansib, i drwa nou bann zenn; e
4. Pour annan en polisi enkliziv nou bezwen asire ki popilasyon zenn osi byen ki bann travayer lazenes ki pli alez avek lektir an kreol, i kapab pli byen konpran konteni sa dokiman.

Realizasyon sa travay ti form par en travay kolaboratif ant Lenstiti Kreol ek Departman Lazenes ek Sport kin dire pandan anviron 1 an edmi.

Parey tin ganny prevwar depi lo komansman sa travay, sa versyon kreol Polisi Nasyonal pour Lazenes in ganny lanse pandan Lasemenn Kreol 2021 dan en pti seremoni kin dire pour anviron 30 minit. Dan sa seremoni Polisi ti ganny prezante avek bann partener kle e answit i ti ganny lanse lo sit web Departman Lazenes ek Sport.

Sa lakonplisman i met sa dokiman a la porte nou popilasyon zenn, bann travayer, groupman ek lorganizasyon ki travay avek zenn osi byen ki piblik an zeneral.

 

 

 

Merna Albert

Zofisye Prensipal Planifikasyon

Departman Lazenes ek Sport